„ფემეა“ არასამთავრობო ორგანიზაციაა, რომელიც ქალთა ჯანმრთელობისა და კეთილდღეობის საკითხებზე 2021 წლიდან მუშაობს.

საზოგადოების არაჯანსაღი კულტურული მახასიათებლების აღმოფხვრისა და ცნობიერების ამაღლების ერთ-ერთი მთავარი საშუალება ინფორმაციის ხელმისაწვდომობაა. სწორედ ამიტომ შეიქმნა Femea.ge, სადაც ეტაპობრივად განთავსდება ქართულად, მარტივი და გასაგები ენით დაწერილი სანდო და გადამოწმებული ინფორმაცია ქალების მენტალურ, ფიზიკურ და სექსუალურ-რეპროდუქციულ ჯანმრთელობაზე, სექსუალობაზე, ურთიერთობებსა და უსაფრთხოებაზე — ყველა იმ საკითხზე, რომელიც ქალების ჯანმრთელობასა და კეთილდღეობას განაპირობებს.

ჩვენი გუნდი

ვერო მელუა

თანადამფუძნებელი

ვერო ფემინისტი აქტივისტი, „ფემეას“ თანადამფუძნებელი და დირექტორია. ის ბავშვობიდანაა ჩართული აქტივიზმში და 2021 წლიდან ქალთა ინფორმაციულ გაძლიერებაზე მუშაობს.

მისი ინტერესის სფეროებია: ქალთა სექსუალურ-რეპროდუქციული ჯანმრთელობა და უფლებები, ძალადობის გენდერული ასპექტები, ქალთა შრომა და მათი ჩაგვრის გენდერული მიზეზები როგორც შრომით ბაზარზე, ისე შინ და ზრუნვითი შრომის თვალსაზრისით.

შოთა ფუტკარაძე

თანადამფუძნებელი

შოთა ფემინისტი აქტივისტი და „ფემეას“ თანადამფუძნებელია. ის უკვე 10 წელია, ქართული ინტერნეტ-სივრცის გამდიდრებისა და ონლაინ-განათლების მიმართულებით მუშაობს, არის მთარგმნელი და რედაქტორი.

მისი ინტერესების სფეროებია: გენდერი, სექსუალობა და სექსუალურ-რეპროდუქციული ჯანმრთელობა, ქალთა და ქვიარ თემის უფლებები.

მეგი ქვეითაია

თანადამფუძნებელი

მეგი ფემინისტი აქტივისტი და „ფემეას“ თანადამფუძნებელია. ის აქტივიზმში აქტიურად 2021 წლიდან ჩაერთო, თუმცა მანამდე ქალთა უფლებების შესახებ წიგნების გამოცემის პროცესში მონაწილეობდა.

მისი ინტერესების სფეროებია: ქალთა ფიზიკური და სექსუალურ-რეპროდუქციული ჯანმრთელობა, გენდერი და ქალების უფლებები.

ინგა ღოღობერიძე

ბლოგერი

ინგა ფემინისტი აქტივისტი და „ფემეას“ ბლოგერია. მუშაობს ძალადობაგამოვლილი ქალების გაძლიერების მიმართულებით.

მისი ინტერესის სფეროებია: ქალთა უფლებები, ძალადობის გენდერული ასპექტები, განათლების როლი ქალთა მიმართ ძალადობის აღმოფხვრის პროცესში და შრომითი უფლებები, განსაკუთრებით გენდერული ნიშნით დისკრიმინაცია შრომით ბაზარზე.

გალა სანდული

ფინანსური მენეჯერი

გალა „ფემეას“ ფინანსური მენეჯერია. ბოლო 30 წელია დაკავებულია ბუღალტრული საქმიანობით. 1994 წლიდან თანამშრომლობს სხვადასხვა არასამეწარმეო იურიდიულ პირებთან.

გალა ყოველთვის იცავს დასაქმებულთა ინტერესებს და მისთვის მთავარია, ადამიანმა მიიღოს სწორი და სრული ინფორმაცია მის უფლებებზე და იყოს დაცული ჩაგვრისგან ნებისმიერი ნიშნით.

ჩვენი მიზნები

ორგანიზაციის საქმიანობისა და პლატფორმის მთავარი დანიშნულება ქალთა თემის ინფორმაციით გაძლიერებაა.

სწორედ ამიტომ, ჩვენი მიზნებია:

1. ქალების ჯანმრთელობასა და კეთილდღეობასთან დაკავშირებულ საკითხებზე ცნობიერების ამაღლება, როგორებიცაა მენტალური და ფიზიკური ჯანმრთელობა, სექსუალობა და სექსუალურ-რეპროდუქციული ჯანმრთელობა, სექსი, ურთიერთობები და ძალადობა;
2. თანამედროვე მედიცინასთან, სტანდარტებსა და მსოფლმხედველობასთან შესაბამისი საინფორმაციო სივრცის შექმნა;
3. ქვიარ და შშმ ქალების საჭიროებებსა და გამოწვევებზე ინფორმაციის გავრცელება;
4. კვლევების, სემინარებისა და ტრენინგების ჩატარება. ასევე სამეცნიერო, საგანმანათლებლო და საინფორმაციო საქმიანობის განხორციელება.

თუ გაინტერესებთ საკითხები, რომლებზეც ვმუშაობთ, ეთანხმებით ჩვენს მიზნებსა და პრინციპებს და გსურთ, დაეხმაროთ ჩვენს ორგანიზაციას, რათა უფრო აქტიურად ვიმუშაოთ ქალების ინფორმაციული გაძლიერებისთვის, შეგიძლიათ, გაიღოთ შემოწირულობა ნებისმიერი ოდენობით.

უღრმეს მადლობას გიხდით ჩვენი მხარდაჭერისთვის!

პლატფორმა Femea.ge შეიქმნა Feminist Review Trust-ის ფინანსური მხარდაჭერით. Feminist Review Trust ბრიტანული ფონდია, რომელიც მთელი მსოფლიოს მასშტაბით მხარს უჭერს პროექტებს ქალთა თემის გაძლიერებისა და კეთილდღეობისთვის.

პარტნიორების სია

ამჟამად ქალების ინფორმაციული გაძლიერების პლატფორმა „ფემეაზე“ ხელმისაწვდომია ორი ვაკანსია:

• ვიდეო კონტენტის შემქმნელი TikTok-ის, Meta-ს Reels-ებისა და YouTube Shorts-ებისთვის
• ფონდების მომძიებელი

დაინტერესებულმა პირებმა CV გამოგვიგზავნეთ ელ-ფოსტაზე: femeaspace@gmail.com 

განაცხადების მიღების ბოლო ვადა: 2024 წლის 15 იანვარი, 11:00 საათი (დილა).

მუშაობის დაწყების თარიღი: 2024 წლის 23 იანვარი.

ზოგადი დებულებები

1.1. „ქალების ჯანმრთელობისა და კეთილდღეობისთვის“ წარმოადგენს საქართველოს სამოქალაქო კოდექსის შესაბამისად შექმნილ წევრობაზე დაფუძნებულ არასამეწარმეო (არაკომერციულ) იურიდიულ პირს.

1.2. სუბიექტი წარმოშობილად ითვლება მეწარმეთა და არასამეწარმეო (არაკომერციული) იურიდიული პირების რეესტრში რეგისტრაციის მომენტიდან.

1.3. საზოგადოების სახელწოდება: „ქალების ჯანმრთელობისა და კეთილდღეობისთვის“

1.4 სამართლებრივი ფორმა: არასამეწარმეო (არაკომერციული) იურიდიული პირი

ორგანიზაციის წევრი

2.1 ორგანიზაციის წევრი შეიძლება იყოს, როგორც საქართველოს, ასევე უცხო ქვეყნის სრულწლოვან ასაკს მიღწეული ფიზიკური და კანონით დადგენილი წესით რეგისტრირებული იურიდიული პირი, რომელიც აღიარებს ორგანიზაციის წესდებას და სურვილი აქვს თავისი წვლილი შეიტანოს ორგანიზაციის მიერ დასახული მიზნებისა და ამოცანების განხორციელებაში. ორგანიზაციის წევრობის მსურველი წერილობითი განცხადებით მიმართავს ორგანიზაციის უმაღლეს მმართველობით ორგანოს. აღნიშნული განცხადების საფუძველზე წევრად მიღების საკითხი განიხილება დამფუძნებელთა საერთო კრების სხდომაზე.

2.2 თითოეული ორგანიზაცია, რომელიც შემოდის ორგანიზაციაში, ინარჩუნებს ორგანიზაციულ და ფინანსურ დამოუკიდებლობას, აქვს წესდება, რომელიც არ ეწინააღმდეგება ორგანიზაციის წესდებას, და ორგანიზაციის დამოკიდებულებას ახორციელებს ხელშეკრულების საფუძველზე.

2.3 ორგანიზაციის წევრობის კანდიდატმა ორგანიზაციის დამფუძნებელ კრებასთან უნდა წარადგინოს შესაბამისი განცხადება და ორი სარეკომენდაციო წერილი, გაცემული ამ ორგანიზაციის გამგეობის წევრის ან სხვა საერთაშორისო, ანალოგიური ან მონათესავე პროფესიული ორგანიზაციის წევრის მიერ.

დამფუძნებელთა/წევრთა უფლებები და მოვალეობები

3.1 ორგანიზაციის წევრი უფლებამოსილია:

(ა) მონაწილეობდეს ორგანიზაციის საერთო კრების მუშაობაში;

(ბ) აირჩიოს და არჩეულ იქნეს ორგანიზაციის მმართველობის ორგანოებში;

(გ) კვალიფიკაციისა და შესაძლებლობების შესაბამისად მონაწილეობდეს ორგანიზაციის პროგრამებში;

(დ) მიიღოს ყოველგვარი ინფორმაცია ორგანიზაციის ხელმძღვანელი ორგანოებისა და პირებისაგან ორგანიზაციის საქმიანობის შესახებ;

(ე) ორგანიზაციის მიზნების შესაბამისად, შესაძლებლობის ფარგლებში, ისარგებლოს ორგანიზაციის საკუთრებაში არსებული ინფორმაციით და მატერიალურ-ტექნიკური საშუალებებით;

(ვ) ატაროს ორგანიზაციის ემბლემა.

3.2 ორგანიზაციის წევრი მოვალეა:

(ა) დაიცვას ორგანიზაციის წესდება და მმართველი ორგანოების მიერ მიღებული გადაწყვეტილებები;

(ბ) გაუფრთხილდეს ორგანიზაციის ღირსებას, ავტორიტეტსა და ქონებას;

(გ) შესაძლებლობებისა და ინტერესების შესაბამისად მონაწილეობდეს ორგანიზაციის საქმიანობაში;

(დ) პროფესიულ საქმიანობაში იხელმძღვანელოს ორგანიზაციის მიზნებითა და პროფესიული ეთიკის ნორმებით;

(ე) ორგანიზაციის საშუალებით დაიცვას თავისი უფლებები და ინტერესები სახელმწიფო ხელისუფლების და მართვის ორგანოებში;

(ვ) ორგანიზაციში წარადგინოს პროექტები და წინადადებები ამა თუ იმ საკითხებზე და მონაწილეობა მიიღოს მათ განხილვასა და განხორციელებაში;

(ზ) შეასრულოს ორგანიზაციის მმართველი ორგანოების გადაწყვეტილებანი, რომლებიც მიღებულია ორგანიზაციის წესდების შესაბამისად და არ ეწინააღმდეგება მათ უფლებებს;

(თ) ორგანიზაციის ჩარჩოებში განავითაროს თანამშრომლობა სხვა ორგანიზაციებთან და გაერთიანებებთან;