ხელბურთის ფედერაციამ კრიტიკის შემდეგ სექსისტური უნიფორმები შეცვალა

ხელბურთის საერთაშორისო ფედერაციამ (IHF-მა) უნიფორმის რეგულაციები შეცვალა, რაც ნიშნავს, რომ ქალი ხელბურთელები ამიერიდან ბიკინის ნაცვლად შორტებით ითამაშებენ.

ცვლილება მას შემდეგ მოხდა, რაც რამდენიმე თვის წინ ნორვეგიის ხელბურთის ქალთა გუნდი ესპანეთთან გამართულ შეხვედრაში შორტების ჩაცმის გამო დააჯარიმეს. ევროპის ხელბურთის ფედერაციამ მაშინ განაცხადა, რომ შორტები „შეუსაბამო ჩაცმულობა“ იყო და გუნდი 1500 ევროთი დააჯარიმა. მომღერალმა Pink-მა ამ რეგულაციებს „სექსისტური“ უწოდა და ნორვეგიის გუნდს მათ სანაცვლოდ ჯარიმის გადახდა შესთავაზა.

უნიფორმის ახალ რეგულაციებში წერია: „ქალ სპორტსმენებს აუცილებლად უნდა ეცვათ მოკლე, ტანზე მომდგარი შორტები“. ასევე ტანზე მომდგარი მაისურები, ნაცვლად ძველი რეგულაციებით დაწესებული მოკლე ზედატანისა.

^{ნორვეგიის ხელბურთის ქალთა გუნდი / Instagram}

კრიტიკის შემდეგ ხელბურთის ფედერაციას რეგულაციების შეცვლა მოსთხოვეს. სექტემბერში ნორვეგიის, დანიის, ფინეთის, ისლანდიისა და შვედეთის სპორტის მინისტრებმა ხელბურთის საერთაშორისო ფედერაციას უნიფორმის პოლიტიკის გადახედვისკენ მოუწოდეს „გენდერული თანასწორობის შესაბამისად“.

პარალელურად ნორვეგიაში მცხოვრებმა ავსტრალიელმა აქტივისტმა ტალითა სტოუნმა change.org-ზე შექმნა პეტიცია, რომელიც ჯარიმის მოხსნასა და ქალებისთვის შორტით თამაშის უფლების მიცემას ითხოვდა. პეტიციამ მალევე 60 000-ზე მეტი ხელმოწერა დააგროვა.

სტოუნმა განაცხადა, რომ მას იმედი ჰქონდა, რომ წესის ცვლილება „სპორტში სექსიზმის და ქალებისა და გოგოების განივთების დასასრულის დასაწყისი“ იქნებოდა. მისი თქმით, ყველა ქალი და გოგო „სპორტში თავისუფლად უნდა გრძნობდეს თავს, ჩაცმულობაზე დარდისა და სექსუალური შევიწროების შიშის გარეშე“.

ივლისში IHF-მა განაცხადა, რომ „ესმის მიმდინარე გლობალური დისკუსია“ უნიფორმების რეგულაციების შესახებ და დაამატა, რომ „IHF-ის მიზანია, ხელი შეუწყოს ხელბურთისა და მისი დისციპლინების განვითარებას, მათ შორის პლაჟის ხელბურთის, რათა ის უფრო მრავალფეროვანი და ინკლუზიური გახდეს“.

IHF-ის პლაჟის ხელბურთის უახლეს სახელმძღვანელოში, რომელიც 3 ოქტომბრითაა დათარიღებული, უკვე განახლებული რეგულაციები წერია.