საზოგადოებისგან ქალებისა და უმცირესობების როლის, მნიშვნელობისა და შესაძლებლობების დაკნინება იმ პრობლემათაგან ერთ-ერთია, რის წინააღმდეგაც ფემინიზმი იბრძვის. თითოეული ადამიანის თანასწორობისა და მათთვის თანაბარი შესაძლებლობების მიცემისთვის ბრძოლა ფემინისტების მთავარი მიზანია.
ჩვენს საზოგადოებაში ფესვგადმული სექსიზმის, რასიზმის, ჰომოფობიისა თუ დისკრიმინაციის სხვა ფორმების გამო ქალებსა და უმცირესობებს საკუთარი ინტელექტის, უნარებისა და შესაძლებლობების დამტკიცება, ყოველდღიურ რეჟიმში, გაორმაგებული ძალისხმევით უწევთ.
თანასწორობისთვის მებრძოლ მოძრაობებს სჯერათ, რომ ადამიანებს თავად აქვთ ძალა, საზოგადოებისგან კი ისინი მხოლოდ ერთ რამეს მოითხოვენ — ამ ძალის აღიარებას.
სწორედ ამისთვის იბრძვის ფემინიზმიც — აღიარებისთვის. ის საზოგადოებისგან ქალთა შრომისა და შესაძლებლობების აღიარებასა და პატივისცემას მოითხოვს, როგორც საშინაო საქმეებში, ისე კარიერასა და კულტურულ საქმიანობაში. ჯანსაღ და თანასწორ გარემოში ქალები შეიძლება კარგი ლიდერები იყვნენ, ქალებს შეუძლიათ კაცების მიერ დომინირებად ინდუსტრიებში წარმატებით მუშაობა ან ოჯახის ისე დაგეგმვა, როგორც მათ სურთ. დღევანდელ რეალობაში კი ქალის წარმატება მის ვიზუალურ მონაცემებს და სქესს მიეწერება, რაც მათ თავს შეურაცხყოფილად და უპატივცემულოდ აგრძნობინებს.
თითოეული ადამიანის ძალის, მნიშვნელობისა და წვლილის აღიარება, დაფასება და პატივისცემა აუცილებელია ჯანსაღი საზოგადოების არსებობისთვის, სადაც ყველა ადამიანს შეუძლია იყოს ის, ვინც უნდა, რომ იყოს.
მთავარი სურათი: dribbble / Nina Aubert