პოლონეთის მკაცრი, აბორტის წინააღმდეგ მიმართული კანონმდებლობა ექიმებსა და მოხალისეებს აიძულებს, რომ სწრაფი კონტრაცეფციის აბები გაუპატიურების მსხვერპლ ქალებს კანონის დარღვევით მიაწოდონ — ციხეში მოხვედრის რისკის სანაცვლოდ.
გასულ რამდენიმე წელში ევროპის მასშტაბით ერთ-ერთი ყველაზე მკაცრი აბორტის საწინააღმდეგო პოლიტიკა სწორედ პოლონეთში გატარდა. ხოლო ექიმებს, რომლებიც ამ კანონს დაარღვევენ, სამ წლამდე თავისუფლების აღკვეთა ემუქრებათ.
„უზარმაზარ რისკზე მივდივართ ამ აბების გაუპატიურების მსხვერპლი ქალებისთვის მიწოდებით. პოლონეთში ეს აბები მხოლოდ მაშინაა კანონიერი, როცა რეცეპტითაა დანიშნული. თითქმის შეუძლებელია, რომ უკრაინელმა ლტოლვილმა ქალებმა ეს რეცეპტი მიიღონ“, — ამხელს პოლონეთში მომუშავე გინეკოლოგი.
ექიმი იმასაც ამატებს, რომ ისინი სწრაფი კონტრაცეფციის აბებს უკრაინაშიც გზავნიან დროებით ოკუპირებულ ტერიტორიებზე.
უკრაინის საზღვართან მომუშავე მოხალისეები ამბობენ, რომ რუსი სამხედროების მიერ გაუპატიურებისა და ძალადობის მსხვერპლთა რაოდენობა სწრაფად იზრდება.
„ჩვენ შევხვდით ათობით ათასობით ლტოლვილს გასულ ოთხ კვირაში. ჯერ ადრეა იმის თქმა, თუ ზუსტად რამდენი მათგანი გახდა სექსუალური ძალადობის მსხვერპლი, თუმცა ეს რიცხვი დიდია“ — ამბობს ერთ-ერთი მოხალისე.
მოხალისე ასევე აღნიშნავს, რომ ძალადობის მსხვერპლებმა არა მარტო ფიზიკური, არამედ უდიდესი ფსიქოლოგიური ტრავმა მიიღეს: „როცა ჰუმანიტარული დახმარების მუშაკები მის (ერთ-ერთი გაუპატიურებული ქალის) დახმარებას ცდილობდნენ, მან მოითხოვა, რომ მხოლოდ ქალი მოხალისეები მიახლოებოდნენ. კაცის დანახვისაც კი ეშინოდა არა მხოლოდ საკუთარი თავის გამო, არამედ მისი 5 წლის შვილის გამოც“.
ასეთ ვითარებებში განსაკუთრებით ცხადი ხდება, რამდენად დამაზიანებელი, უსამართლო და სასტიკი შეიძლება იყოს პატრიარქალური სისტემებისგან შექმნილი სექსუალურ-რეპროდუქციული ჯანმრთელობისა და უფლებების პოლიტიკა.
ამ ტიპის კანონმდებლობები პირდაპირაა მიმართული ქალის სხეულის ხელყოფისა და მისი პირადი არჩევნის უგულებელყოფისკენ.
წყარო: Online Media Svidomi
მთავარი სურათი: Reuters
